Les coses van permal. Na comarca d’Avilés tenemos 15.000 presones en paru, n’Asturies vamos camín de les 100.000 y nel Estáu español pasamos de los 4 millones. Los despidos cúntense por millares, los Expedientes de Regulación d’Emplegu (ERE) por docenes y el 35% los paraos y paraes yá nun cobren ná.
Hai dellos meses, el Conseyeru Trabayu, Graciano Torre, llamaba “xabaces” a los trabayadores d’Asturmasa porque la fuelga que teníen prevista podíe prevocar la parada d’un fornu altu de Veriña. Agora, Arcelor nun solo paró esi mesmu fornu, sinon que tamién paró la metada les baterías de cock, forció un ERE a la totalidá la plantía, conxeló los sueldos y ta entamando un procesu pa prescindir de toles empreses ausiliares. ¿Quién ye agora’l xabaz?. Facer una fuelga pa defender el puestu trabayu nun ye denguna xabazada, la braera xabazada ye ser Conseyeru Trabayu y da-yos la espalda a milenta de trabajadores que s’enfrenten al paru y la probitú.
Pero nun ye sólo Arcelor, Cristalería intenta llantar el so tercer ERE y pesllar el Llaboratoriu, Alcoa va conxelar los sueldos dellos años y enanchar la xornada llaboral, DuPont va amenorgar la so plantía, na Asturiana de Zinc la defensa d’un conveniu xustu apareya xuicios y represión pa los trabayadores, Aleastur vien de presentar un ERE que s’amesta a otros munchos comu’l de Daorje, n’empreses comu Mecafran, con carga trabayu asegurada pa dellos años, tan echando hores estres a mamplén, nel Ayuntamiento d’Avilés la engarradiella ente los y les monitores de les piscinas y el Gobiernu municipal sigue tando abierta, el seutor de la pesca va fundiendo dapocu, los comercios piesllen ún tres otru, la costruición perdió milenta d’emplegos y na hostelería les condiciones llaborales son ca vegada más precaries.
Por embargu, la cris nun tien les mesmes consecuencies pa tol mundiu por igual. El paru xorrez descomanadamente, los salarios nun lleguen a la fin de mes, munchos/es trabajadores escosen la prestación por desemplegu, pierden les sos viviendes y yá entama a faltar la xinta en munches cases. Pero, demientres, los bancos asoleyen beneficios multimillonarios y siguen recibiendo miles de millones d’euros del dineru públicu.
Y, aprovechando la situación, la gran patronal y los sos gobiernos intenten llevar alantre una reforma llaboral p’algamar el despidu de baldre, la conxelación de sueldos, l’enanchamientu la xornada llaboral, el retrasu la edá xubilación y la reforma’l sistema pensiones.
Pero la torga fondera ye, ensin dubies, el modelu de produición capitalista, sofitáu namás nel xorrecimientu económicu a toa costa, pal beneficiu d’unos pocos. Ye necesariu camudar esti sistema de produición por otru estremáu, cuyu finxu seya repartir la riqueza y satisfacer les necesidaes humanes.
Nun podemos dexar que les coses continúen pel camín que lleven. Ye necesariu que nos movilicemos, que salgamos a la cai y avancemos haza una fuelga xeneral, comu preséu pa garantizar:
-Trabayu dignu pa toes y toos.
-Si nun hai trabayu, prestación por desemplegu indefinida.
-Renta básica indefinida.
-Salarios y pensiones mínimas de 1.000 euros.
-Drechos básicos pa toles ciudadanes/os, garantizaos pol Estáu (alimentos, salú, vivienda y educación).
-Nacionalización de la banca.
CONVOQUEN: trabayadores de TSK, de Mecafran, d’Aleastur, de la hostelería d’Avilés, monitores de les piscines d’Avilés, despedíos de Daorje, CSI-Arcelor, Corriente Sindical d’Izquierda, Partido Comunista de Asturias en Avilés, Partido Comunista de Asturias en Corvera, Andecha Astur, Partido Comunista de los Pueblos de España, Colectivos de Jóvenes Comunistas, Unidá Nacionalista Asturiana, Unión Proletaria, El Militante, Sindicato de Estudiantes, Unión de Juventudes Comunistas de España.
A esta convocatoria amestáronse tamién les trabayadores de la empresa KONECTA y el sindicatu CGT
Archivado en: Movimientu Obreru
