El pasáu 8 de mayu, el PCPE-Asturies, Andecha Astur, los CJC/CMC y Darréu, entamamos una aición conxunta nel marcu’l festival “Tolo d’Asturies” qu’entama l’ayuntamientu de Llangréu, pa condergar la sangrante situación represiva que sufren estes organizaciones ente otres, de la mano’l PSOE llocal.
Estes organizaciones, como desplicamos meyor nos panfletos repartíos, acumulen más de 35.000 € en multes pol simple fechu de tresladar la nuesa propaganda a les cais. Mentantu, el gobiernu municipal fai ver el doble raseru que gasta, colocando la so propaganda onde-y peta ensin mayor torga. Amestar tamién la ñegativa l’ayuntamientu de Llangréu a ceder espacios públicos a les nueses organizaciones tanto p’actos culturales como políticos.
Tres el repartu de los panfletos qu’editamos, el grupu Dixebra dionos pasu pa que xubiéremos al escenariu cola pancarta que traía “35.000 € por nun pensar como vosotros: NON + MULTES”. Una militante lleeó’l comunicáu conxuntu. Los glayios de “tamos fartos de represión” dieron por finada l’aición, que tuvo perbona acoyida por parte de los ciudadanos y ciudadanes que s’allugaben nel conciertu. Hebo un aplausu unánime y munchos glayios de sofitu.
Esta sedrá una más de les aiciones que llevaremos alantre pa denunciar la represión que’l gobiernu municipal, encabezáu por Esther Díaz, lleva a cabu escontra les voces disidente. Les agrupaciones llocales del PCPE-Asturies, Andecha Astur, los CJC-CMC y Darréu desiximos garantíes democrátiques y de llibertá d’espresión nel Conceyu.
Les organizaciones convocantes queremos agradecer a Dixebra que ms cediera un espaciu dientru la so propia actuación y la comprensión del grupu col nuesu casu de represión común.
¡NIN UN PASO ATRÁS ESCONTRA LA REPRESIÓN!
¡ALCALDESA REPRESORA!
¡PSOE FACISTA!
PCPE ASTURIES – ANDECHA ASTUR – CJC/CMC – DARRÉU
Archivado en: Antifacismu
